Маин выре театральной критик?

Вуизы шутэтскон нуналъес, куартолэзь, ку гуртэ бертоно, бакчаез копано. Мон нош городын кыли, азьтэм. Улонлы огпол, дыр, Москваысь критик Павел Андреевич Руднев ми доры вуиз. 2-3 куартолэзе со кык пӧртэм лекциос лыдӟиз. Ну мон и кыли кылзӥськыны. Нош малы та сярысь та дырозь ӧй гожты на? Мон верай ни, азьтэм мон шуыса? Самой-самой бадӟым.

***

Нырысетӥ лекция "Маин выре театральной критик?" нимаськиз. 

П.А. трос пьесаосты лыдӟе, спектакльёсты учке, эпохалэсь куаразэ шӧдон понна. Театр - со футуристической искусство луэ, пе. Милям сознанимы событиослэсь азьлогес бызе, ми эскериськом вуоноез театрын. Соин театрлэн функциез - возьматыны вуонолэсь проблемаоссэ.

Театральной критик, одӥг палась, юрттэ валаны шонер-а сюрестӥ мынэ режиссер яке драматург аслаз ужаз.

Трос лыдӟыса-учкыса-тодыса, Руднев малпаз аслы "Театральной критиклэн кодекс": 

1. Эн ӵошаты феноменэз идеалъёсын, исследовать кары ассэ феноменэз. Тургенев,  кылсярысь, ноку но уз луы уродгес туала писательёслэсь. 

2. Возь аслэсьтыд позицидэ, авторитетъёс вылэ эн учкы. 20, 21 дауръёсы канонъёс дрейфовать карыны кутско, соин валаны кулэ, кыӵе социокультурной условиосын улэ веран. Кулэ тодыны, мАлы тон шуиськод "бен",  нош мАлы "ӧвэл", ас кылъёс понна ответственность возьыны.

3. Йырад возьыны, одӥг театрлэсь сяна, вань трос мукет театръёс но шуыса. Обобщенной кылъёс кӧшкемыт провинциальной театръёс понна быгато луыны.

4. Критикаез гожъяку, детальесты учкы, оппонентъёс ичигес луозы. Абстрактной веранъёсын котькудӥз соглаш уз луы, нош детальёсты ке учкыны, малы озьы критик гожтэ
капчигес валаны.
5. Эн гожты спектакль сярысь гинэ, мед спектакль луоз мер улонлэн люкетэз. Рецензия тунсыко театрлы гинэ.
6. Мукет критикъёслы эн мыты.
7. Гожъя театрысь адямиос сярысь, соосын диалог кадь нуыса.
8. Егит "суредасьлы" осконлык кулэ.
9. Дунъяса но куаретыса вуонолы ужано. Нокин уз бызьы рецензия бере воштыны спектаклез, кудӥз ини вал.
10. Субъективной веранъёсын тон астэ критиковать кариськод. Не тыныд мӧзмыт, а тон мӧзмыт. Вера ма тон валад, коть валад мукетсе. Номырез ӧд вала ке со тынад шуг-секытэд.
Та бере Руднев юанъёс вылэ ответ сётылӥз. Ми фильтръёс, пе. Милемлы кулэ гожтыны ма луиз милям мугоренымы, спектакль учкыса. Мӧзмыт юри луыны быгатэ. Минимализмын, кылсярысь, озьы. Кызьы вераз Высоцкий, "и в награду нам за безмолвие, обязательно будет звук". Вань интеллектульной искусство на эшшо, со милемыз уг бугыръя, эмоциосты уг потты. Отын, кытын вань эмоция, зал уллёлы укша.
***
Кин ке юаз на, Москва сяна центр искусстволэн кытын ке быгатэ луыны-а. П.А. вераз: "Куке субъектъёсын но искусство азинскоз. Тенденция сыӵе мынэ. Юан гинэ - ку со луоз? Бадӟым шуг-секыт со понна социо-культурной политика умой ӧвэл шуыса. Инвестициос но ичи."

Отрядной улон.

Мынам котьку потэ вал мукет шаеръёсты учкыны, озьы мон проводникъёслэн отряд сярысь тодӥ но соку ик отчы пыри. Тани быдэс ар ӵоже ини мон улӥсько отрядын.Табере монэ боец но И.О. комиссара нимало. Мынам "Пегас" нимо отрядэ. Малпасько вал татын гужем ужано гинэ луоз. Но мон янгышай. Татын мыным усьтӥськиз бадӟым но яркыт дунне, кытысь потонэз мон уг ни адӟиськы. кин ке милемыз секта нима, кылсярысь)))
Гужем ужаммы - со целина нимаське, нош со сяна вань на ужлы дасяськон период. Озьыен ми быдэс ар ӵоже гужемлы дасяськиськом. Ортчо трос пӧртэм конкурсъес, отрядной ужрадъес, тулыс вуэ ке, дышетскыны кутскиськом, медосмотр ортчиськом.
Малы кулэ ужрадъес но конкурсъес, соос ужаны уг юртто ук? А соос кулэ чик тодмотэм адямиосты эшъяськытыны, одӥг команда карыны. Со проводниклы туж кулэ, малы ке шуоно, пӧртэм секыт ситуациос кылдо ке, тынад отряд сяна мукет городын нокин но матынгес уз луы. Трос пол кылылӥ ни бадӟым ужрадъесын, ку сцена вылысь юрттӥсьес, спонсоръес кыӵе ке кыл верало ке, одно ик "сыӵе атмосфера ноку ӧз адӟе на" шуо. А соос отрядной движенилы кыдекын адямиос.
Малы мон шуи чик тодмотэм адямиос отрядъесын, ку соос ог-огзэ умой ини тодо, ӵошен ужазы? Отряд медаз быры шуыса, котькуд ар отрядэ выль адямиос пыро, соос кандидатъес нимасько. Соос боецъесты, но старикъесты уг тодо на. Озьыен, отрядъесын туж трос выль тунсыко (отрядэ вуо тунсыко адямиос гинэ) адямиосын тодматскыны, трос эшъесты но яратонэз шедьтыны луэ.
Вань региональной ужрадъесы отрядлэн пыриськон, отрядной ужрадъесты ортчытон - со комиссарлэн йырвисенэз. Командир - со ваньмыз понна отвечать каре, целина умой ортчон понна эшшо но тросгес. Комслужбае пыро мастер, врач но сан-инспектор на. Соослэн но трос ужзы.
Ужлы дасяськон период тунсыко. Нош целина - со верантэм классной дыр! Сомында серемес учыръес, кудъесты асьмеос гинэ валаськомы, выль интыосты, шаеръесты дунтэк адӟиськомы, спевкаос, ужрадъес, выль адямиос, кудъесын луэ вераськыны... Та понна эшшо зарплата сето! Куатьтон сюрслэсь тросгес луэ.
Вож курткаос сярысь верало на. Со целинка нимаське. Сое сето одӥг целинаез ортчем бере, боец званиен ӵош. Отчы ошисько пӧртэм значокъес, но тыбыре суредаське накатка - котькуд отрядлэн аслаз. Та куртка туж дуно милемлы, малы ке шуоно сое асьме уж понна сето. Нокинлы мукетлы ас целинкаез сетыны уг яра, нулдӥськом аслэсь гинэ. Со тынад вылын ке, ӧвэл кулэ тамак кыскыны, матерной кылъесын вераськыны, вина юыны.

Поездын малы ке котькудӥз тынад напарник эш луэ. Со озьы ик кыле музъемын но, но трос адӟылӥськыны уг кылды ни, котькудӥзлэн аслаз улонэз. Со гуртын пинал дыре ӧвэл ни, ку ми котькуд нунал ӵош шудӥм, дыр азьлань но азьлань нуэ, бадӟымъеслэн улоназы. А мон неисправимой пинал но романтик, мыным али но озьы шудэме потэ.
Соин, дыр, мон луи И.О. комиссара, мед повод луоз адӟиськыны ваньменыз. Али мон ӧжыт юрттӥсько гинэ комиссарлы, нош целинаын мон полноценно ужало ни. Милям отряд кык бригада луыса ужалоз, мон одӥглэн комиссар луо. Али ини дасяськисько, пӧртэм ужрадъесты малпасько, туж тунсыко уж.

Соин ӵектӥсько котькудӥзлы, кин тае лыдӟиз, вуыны СОП "Пегас"-э, яке кинлы ке мадьыны та сярысь. Татын умой, тунсыко адямиос, кудъес шуо "Нет!" мӧзмыт гужемлы. Соосын ӵош тӥ будоды, ас сюрестэ шедьтоды, малы ке шуоно, татын котькин маин ке но тунсыкъяське.
Вераме потэ вань мукет отрядной направлениос, кылсярысь вожатойес, строительес, ветеринаръес. Кинлы мар кельше. Нош ваньзэсты милемыз огъятэ эшъяськон атмосфера но целинаез, ужез яратон.

но СОП "Пегас" соос пӧлысь самой умой!:))

Ин гож

Туннэ ортчиз литературая «ИНГОЖ» студилэн нырысетӥ пумиськонэз. Ми тодматским, собере туала литература сярысь вераськон мынӥз. Котькыӵе жанрен мед тон гожты, нош классикаез вунэтоно ӧвэл. Верало ук, правилоосты нарушать карон азе, соосты тодыны нырысь кулэ. Кылсярысь, егитъёс тыршо гожъяны Вера Полозкова кадь, а тодо-а соос азьло гожъяськисьёсты, ӧйтӧд. 
Эскеризы эшшо Н.Михайловлэсь вероссэ на. А.Шкляева кылбурзэ лыдӟиз. Критикъёс ас малпанзэ веразы. 
Татын ми, огшоры студентъёс, быгатӥськом визь-нод басьтыны дано гожъяськисьёслэсь: Сергей Матвеев, Пётр Захаров, Георгий Грязев, Ульфат Бадретдинов, Татьяна Чернова, Лидия Нянькина, литературоведъёс Виктор Шибанов, Вера Пантелеева. Та творческой омырын литератураен тунсыкъяскеммы медаз ышы. Конструктивной критика юрттоз умойгес но умойгес тыршыны. 
Мон ваи ШУД-ын гожтэм пьесаме, но со ӟуч сямен мынам. Возомнила аслым, сое берыктозы но лыдӟозы шуса. Озьы луоз ке, мон шумпото.

Книга поттыны но юрттозы, кулэ луиз ке. Ваньмыз ми понна. Тон, Даша, гожъяськы гинэ, сиськыса но кӧлыса быдэс нунал интые.

Витёнтэм ужрад

Туннэ пукисько сыӵе, зачетлы дасяськисько. Вконтакте гожто ужрадэ адямиос уг тырмо, али ик мыноно. Мон соглаш луи, ма со зачет. Кытчы ми мынӥськом, малы но кӧнялы мон ӧй тоды.

Вуимы озьыен Якшур-Бодьяе. Абдраса потӥ автобусысь. Мынӥм кыӵе ке площадь вылэ. Со пичи инты магазин азьын. Татын 10 пӧсьтолэзе 2010 арын, 300 арес Якшур-Бодья черкогуртлы тырмон нуналэ, усьтэмын вал уникальной архитектурно-скульптурной ансамбль "Якшур-Бодья - открытый дом". Со сӥземын учырлы, ку татчы вуылӥз Александр I 1824 арын. Вань куноосты площадь вылын вите выжы кутскись выжылэсь Бодья, нырысетӥ памятник удмурт кышнолы Удмуртиын. Пичи пи но парсь - ваньмыз вуиллям учкыны император но солэн каретаез вылэ. Пи - выжы азинсконлэн пус, нош парсь - пус умой улонлэн но трос нылпи вордэмлэн. Капка сылэ, со вылын - пус Бодья выжылэн. Асау (священные) кызъёс но тангыра, вашкала музыкальной инструмент, иворто шумпотон Якшур-Бодьиысь учыръёс сярысь. Нылкышноос удмурт дэремен но ачиз Александр I возьматӥзы но мадизы милемлы та историез, перепечен куноятӥзы. Кинлэн потэ вал, соослэн пукыны парсь вылын луиз, тангыра вылын шудыны, коньдонзэ зыраны бадӟым рубль борды, фотография пуктыны императорен, но ваньмы ӵош, киосын кутӥськыса, кызъёс котыртӥ, синъёсты кыньыса, желание загадать карим. Собере мынӥмы асьме зарни карета доры.

Автобусын йыр висемысь дугдӥз, но Александр I кытчы ке ышиз. Со интые кыӵе ке нылкышно-экскурсовод вуиз. Со шуиз, ми, пе, мынӥськом али Ф.А. Пушиналы, Советской Союзлэн Геройлы, сӥземын нимо ульчаетӥ. Татын пуктэмын коркаос интые азьло мукет зданиос вал. ДОСААФ интыын, кылсярысь, постоялой азбар вал, кытчы император вуылӥз. Но та ульчаысь ми кожим Сюровай гуртэ. Кузь сюрес ӵоже экскурсовод милемлы мадиз ма азьло татын вал.
Тани вуим гуртэ. Татын удмурт куинь нунало сюан лэсьтӥмы. Организаторъёс удмурт кылын вераськизы нырысь, собере валамон луиз, тросэз уг валало шуса. Но ма карод. Вань обрядъёсты, ваньзэ, кызьы кулэ, лэсьтӥм. Табань сиим, гурезь вылысь нискыламы, кырӟамы, эктымы.
Собере милемыз столовое нуизы, ческыт сиським.
Кожимы музее. Татын адӟимы зэмос арбериосты, кудъёс верало, татын Александр I зэмзэ вал шуса. Пӧйшуръёслэсь та нюлэсъёсысь чучелооссэ адӟим. Этнографической отделын вашкала удмуртъёслэн ужъёс сярысь тодӥм, тунаськонъёс сярысь но. Милемлы но эскертыны сётӥзы. Нылашъёс шумпотыса тунаськизы.
Кыклы милемыз люкизы собере. Одӥг группа мынӥз выставочной залэ, нош мукет поделкаосын выставкае. Выставочный залын ми пумиським суредаськисен Д.Нелюбинэн. Суредъёсты учким, асьмеос но суредаським. Поделкаосын залын асьмеос обезьянэз лэсьтӥм - кыз вылэ шудон, брелок яке коть ма мукет.
Та вылын йылпумъяськиз ваньмыз. Туж тунсыко экскурсия вал, ми Якшур-Бодья ёрослэн вашкалаэн тодматским. Эшшо чебер инкуазь татын! Якшур-Бодья 80% нюлэскысь пӧрме ук.

Мозговой штурм

Таяз субботае В.Шергин выльысь вуылӥз ми доры. Соин кык нунал ӵоже занятие-интенсив ортчиз.
Вуим ми котьку кадь ик кык часлы. Витим Шергинэз, пьесаосты, кин кыӵе лыдӟиз, обсуждать карим. Шергин вуиз но гуртын уж лыдӟыны кутскиз. Ми фотографиосты бырйим, но соос вылысь яке соос сярысь пьеса гожтыны кулэ вал. Мон уйин гожтӥ, котьку кадь берпуметӥ нуналаз кельтӥ ужме. Олома но йырам лыктӥз, ачим абдрай. Уйин тунсыко гожъяськыны. Собере ньыль час изьыса, мынӥ ШУД-э. Табере отын пьесаме лыдӟизы но яраз со, лэся. Нырысь мае ке но коть лэсьтӥ шуса малпай, ато теликын ини возьматӥзы, нош номыр ӧй лэсьты на эшшо, умой уг поты. Озьы лыдӟиз Шергин милям ваем пьесаосты, эшшо ачиз кинлэсь ке ваем. Собере шуиз уйин кыльыны кулэ, выжыкылэз гожтом, пе. Ми абдрамы, но та малпан классной потӥз, мон соку ик соглаш луи.
Перерыв лэсьтӥм "Колбаса/фрагменты" пьесаез учконлы. Мон кыкетӥяз учки ни, куинетӥяз но учко, кулэ луоз ке. Собере мынӥм нош ик Арт-Резиденцие.
Дас-дас кык кузя люкаським, тани ваньмыз кутскиз. Мозговой штурм. Шергин возьматӥз кызьы кутсконо пьеса вылын малпаськыны, ужаны, ку заказчикъёс ичи срок сётӥзы и тема тӥледлы ӧвэл кулэ малпано. Асьсэлэсь. Та секретной инфа:D Мынӥськом азьлань.

Ми дас адями вал, котькудӥз одӥг сценаез гожтӥз но быдэс пьеса пӧрмиз. Ӵукна редактировать карыса пуким, мон укмысозь гинэ быгатӥ пукыны, кошки общагае изьыны. Нош кин ке дас кыкозь пукиз на. Куинь часэ пьесаез лыдӟыны-возьматыны кылемъёслы кулэ вал. Арт-Резиденциын пичи партизанчикъёс заниматься каро вал, ми соослы лыдӟыны малпамы. Выжыкыл ук. Нош тросэзлы ӧз яра, мкш одӥг Шергин лыдӟиз, нош пиналъёслы возьматыны кулэ, читкаез уг быгато кылзыны. Кин бадӟымгес гинэ вал, соослы яраз, кызьы Шергин вань персонажъёсты пӧртэм возьматыны быгатӥз. Одӥг нылаш шуиз озьы: "Мыным ӧз яра удмурт горд пи - Лопшо Педунь (*ми со сярысь гожтӥм, удмурт пьеса ӟуч кылын), мкш мынам дышетӥсь-удмурт монэ ултӥяз. Соин табере мон вань удмуртъёсты уг яратӥськы." Озьы но луэ.
Собере ваньмы кошким гуртэ.
Мон та дыр ӵоже умойгес тодматски тунсыко-претунсыкоесь адямиосын, олома но сярысь вераським. Ми доры одӥг полячка ветлэ, кылсярысь. Со УдГУ-ын кыӵе ке программая дышетске филологлы. Солы туж яра путешествовать карны, со кытын гинэ ӧй вал, автостопен но ветлылӥз. Туж яра солы Грузия, мкш "там душа, прямо душа-душа, я влюбилась с первого взгляда!" Соин Ижын солэн одӥгез яратоно интыосысь - со рынок :D Но кулэ вераны, Иж солы яра.
Та одно ик крутоесь шутэтскон нуналъёс вал! Мон мукет нуналаз дышетсконысь бертӥ но изьыны выдӥ соку ик. Соседкаос сайкатӥзы, серекъяло, уг быгато. Монэ камерае снимать каризы. Отын мон олома но вераськисько вал. Сыӵе трос впечатление басьтӥ.

Боженька

Шӧдтэк шорысь мон театре ветлыны кутски. "Les Partisans" нимо театрлэсь постановкаоссэ, читкаоссэ выльысь но выльысь учкеме потэ.
29 шуркынмонэ ветлӥ В.Печейкинлэсь "Боженька" нимо пьесалэн читкае. Со сыӵе пьеса, кытын асьме нуналысь нуналэ улонысь важной событиос возьматэмын мусо пӧйшуръеслэн улонзы пыр. Сыӵе гротескной пародия.
Пумаз обсуждение вал. Мон кылзӥськыны кыли. Таӵе кылъес веразы:
-татын возьматэмын вань социальной институтъёс
-юан религия сярысь кылдӥз: малы соос, туалетэ мыныку, вӧсяськыны мыно шуса малпало вал
-юан (уг валаськы, кызьы удмурт сямен луоз) "честности с самим собой"
-пьесаын сыӵе поворотъёс вань, ку тон урод герой сярысь умой малпаны кутскиськод - аслэсьтыз правдазэ адӟиськод; соин ярлыкъёсты ошыны ӧвэл кулэ
-трос юанъёс сётэмын, кудъёс вылэ ответъёс ӧвэл; татын адӟиське зэм искусство, мкш искусство - со юанъёсты сётон
-та пьесаез возьматыны быгатыны луэ пичиослы но, бадӟымъёслы но; кызьы вераз Ньютон, тон шарлатан, ку уг быгатӥськы секыт малпанэз пиналъёслы валэктыны
-ӵушъял одӥгез соос пӧлысь дуннеез эскериз, соин, дыр, "Инмар" вуиз солэн гуртаз
-малы эрикез яратӥсь тури ассэ ӝог прищучить сётӥз? Яке со мученической кулон вал, яке та системаын мукет мае ке лэсьтыны ӧз луы солэн
-Россиын театрез воспринимать дышизы мнение сётон кадь, кудзэ тон соку ик поддержать карыны кулэ, нош кунгож сьӧрын та авторлэсь мнение гинэ шуса тодо; милемлы но кулэ озьы дышыны
Но трос мукет малпанъёс веразы на обсуждение ӵоже. Та пьеса сяна, мынам потӥз тодматскыны В.Печейкинлэн мукет пьесаосын эшшо на. Интервью но лыдӟи татын http://vk.com/away.php?to=http%3A%2F%2Fptj.spb.ru%2Farchive%2F74%2Fsociality-or-die%2Fvalerij-pechejkin-pochemu-bymne-nevesti-naciyu-vpodvaly%2F&post=-107688742_4
Туж крутоесь шудӥсьёс но офигенский текст монэ лобӟытӥзы!

about ШУД

Таяз субботае милям вал кыкетӥ занятие. Гуртэ уж лэсьтыса, оформлениен янгышамы. Соин тае разбирать карим.
Драматургия - со чурыт, грубой искусство. Соин глобальной проблемаосты возьматоно ӧвэл кулэ, конфликтэз адямиос куспын гинэ. Макем конкретнойгес, сокем умойгес. Эшшо умой драматург кулэ выль адями тип малпаны, гожтыны современникъёс сярысь. Юмор кулэ луыны. Зрительлэсь, лыдӟисьлэсь синвузэ поттыны понна, нырысь серекъятыны быгатоно. Улонэз чаклано, эскероно сыӵе палъёссэ, кудъёссэ ум адӟиське.
Идеальной сцена сярысь. Шедьтоно главной героез, целез малпано. Ми тодыны кулэ, ма потэ одӥг адямилэн мукетлэсь. Макем вачепумит цельёс, сокем лэчытгес конфликт. Пуш конфликт возьматоно: триада - вера одӥгзэ, малпа кыкетӥзэ, лэсьтэ куинетӥзэ. Исходной событие кулэ воштыны геройёсты но лыдӟисьлэсь-учкисьлэсь отношенизэ. Нош адямиос-геройёс уг вошъясько ук. Соин шонергес верано ке, вошъяське пуш состоянизы.
Одӥгез валтӥсь драматурглэн цельёс пӧлысь - со пӧяны ожиданиосты, абдратыны. Соин развязкаос неожиданной луыны кулэ. Таӵе юанъёсты учким.
Собере Миша Соловьев Любимовка фестиваль сярысь мадиз. Но параосъя люкиськыса, кыӵе ке сцена басьтыса, малпано вал солэсь азьвыл событиосты но выльдытоно.
***
Ӵуказеяз вуи филармоние В.Шергинлэсь "Колбаса/фрагменты" постановкае. Тунсыко, но нырысь  шуг валаны вал, ма лэсьто шудӥсьёс. Синъёс ӧз на дыше.